2. áigodat:
Eallingeardemuitalusat, oskkoldaga čállosat ja muittašangirjjit (sullii 1840–1930)

Lars Jacobsen Hætta / Jáhkoš-Lásse
1834–1896

Lars J Heatta

Lars J. Hætta. © S. Tromholt / Norsk Folkemuseum.

Gii lei Lars Jacobsen Hætta?

Dubmehalai giddagassii

Lars Jakobsen Hætta riegádii Guovdageainnus 1834:s. Son lei mielde Guovdageainnu stuimmiin 1852:s, man dihtii dubmejuvvui jápmimii. Jápminduopmu láivviduvvui giddagasduopmun eallinahkái. Son beasai giddagasas 13 jagi maŋŋá, go lei čájehan duohta gáhtavašvuođa ja buorre láhttema giddagasas. Son lei dasto oahpaheaddjin Guovdageainnus.

Duodji

Lars J. Hætta duojit. © RiddoDuottarMuseat.

Giddagasas duddjui ja jorgalii Biibala

Son duddjui giddagasas Akershus ladnis smávva duojážiid sámi eallimis. Jáhkoš Lásse lea ovttas professor Friisain dárkkistan jagis 1840 almmustuvvan Ođđa Testameantta jorgalusa ja jorgalan Biibbala davvisámegillii.

Biibbaljorgalanbargu álggii juo Akershusa ladnis ja joatkašuvai maŋŋil go beasai doppe. Davvisámegiela ollis Biibbal almmustuvai 1895:s ja lea geavahuvvon dan rájes. Easkka dál lea ođđa jorgalus barggu vuolde.

Lassediehtu

Lars Jakobsen Hætta ja Anders Bær leigga ovttas giddagasas ja dalle čáliiga maiddái muittašemiid ruovttuguovllu dilálašvuođaid birra, muhto dat ii leat dievaslaš girjin almmustuvvan, go teaksta maid čáliiga giddagasas nohká fáhkka, gaskan cealkaga. Almmuhuvvui «Mui'talusat»-girjin 1958:s vuosttaš geardde, man Knut Bergsland lei doaimmahan.



 

© Davvi Girji OS 2008