4. áigodat: Áigi máilmmisoađi gaskkas (sullii 1920–70)

Pekka Lukkari / Biehtár Ánde (1918–2006)

bildebeskrivelse

Pekka Lukkari. © Minna Saastamoinen.

Oahpaheaddji, kulturpersovdna ja politihkár

Biehtár Ánde lei riegádan Ohcejogas Veahčakis. Son lei skuvlajođiheaddjin Anára girkosiidda skuvllas ja lei maiddái sámepolitihkár, earet eará Suoma Sámi parlameantta (dál Sámediggi) lahttun badjel 10 jagi, dan vuođđudeamis 1973' rájes. Biehtár Ánde doaimmahii maid bláđiid Suoma Sámis: Sábmelaš (1948–50), Sabmi (1948), Tunturisanomat (1951–52).

Lávllagirječálli

1950-logu álggus son doaimmahii skuvllaid atnui Lavlagak-lávllagirjji, ja mas ođđa hápmi bođii Lavlagak II namain 1963:s. Dán guovtti lávllagirjjis leat ollu lávlagat maid skuvllain leat álo lávlon sámegillii, ja ain lávlot. Omd. lávlla Sámieatnamii, maid dás beasat lohkat ja gullat, lea šaddan beakkán lávllan sámiid gaskkas, man heive lávlestit vaikkoba sámeálbmotbeaivve.

Oahppogirjjit ja sátnegirjjit

1970-logus son doaimmahit mávssolaš teakstačoakkáldaga Lohkamušak 1972:s ja almmuhii Sámi-suoma ja suoma-sámi sátnegirjjiid (1974 ja 1977). 1976: bođii su diktagirji Kaggesčiekčik mas leat divttat maid earet eará skuvllain ja leat ollu geavahan lohkamuššan ja vuolggaheaddjin iešguđetlágan luovvalas doaimmaide. Biehtár Ánddes lea rikkes giella ja son máhttá geavahit govvideaddji sániid nu ahte lohkki buot áiccuiguin vásiha teavstta. Loga mat su divtta: Biergoruitu.


Sálmmat ja šattut

Pekka Lukkari lea bargan sálbmagirjji doaimmahangottis 1960-logus ja Sámi Sálbmakomiteas 1987–1992, ja son lea jorgalan ja heivehan ollu sálmmaid sámegillii.

Biehtár Ánddes lei maid lassioahppu šaddodiehtagis, oainnat son juo 1947:s lei dutkan duottarguovlluid šattuid. Son almmuhiige sátnegirjji ealliid ja šattuid sámegielnamahusain 1990:s.

Girjjit

  • Lavlagak (1950) doaimmahan
  • Lavlagak II (1963) doaimmahan
  • Lohkamušak (1972) doaimmahan
  • Sámi-suoma ja suoma-sámi sátnegirjjit (1974 ja 1977)
  • Kaggesčiekčik (1976)
  • Ealliid ja šattuid sátnegirjji (1990)

 

Gáldu

Min Áigi: nr. 95 24.11.2006 In memoriam. Čállán Luobbal Sámmol Sofe. Sofia Aikio.



 

© Davvi Girji OS 2008