5. Ahtanuššama áigi (1970–1995)

Astrid Johnskareng (1939–)

Astrid Johnskareng

Astrid Johnskareng. © Michal Aase / Davvi Girji.

Gii lea Astrid Johnskareng?

Astrid Johnskareng lea riegádan ja bajásšaddan Kárášjogas ja son lea bargan kristtalaš bláđis Nuorttanasttes doaimmaheaddjin ja journalistan 1993' rájes. Astrid Johnskareng lea girječálli, doaimmaheaddji ja kulturbargi, gean mánát dovdet maiddái sámemánáid TV-ráiddus Curbmecuippit. Son lágida mánáidbottuid DSF-radios, mii lea kristtalaš lagasradio, man doaibmabáikin lea Kárášjohka. Astrid Johnskareng lea 1999:s ožžon Kárášjoga gieldda kulturbálkkašumi kulturbargguidis ovddas.

Astrid muitala ahte sus lea guhká juo leamaš čállinberoštupmi ja muitalanmokta. Easka 40-jahkásažžan son oahpai čállit sámegiela ja lea dan rájes buvttadan máŋggalágan čállosiid.

Mánát ja nuorat váimmu áššin

Su váimmu áššin lea dat ahte mánáid ja nuoraide galgá leat sámegillii fálaldat, sihke girjjálašvuohta ja mediafálaldat. Girjjálašvuohta rahpá mánáide máilmmi, mii movttiidahttá mánáid geavahit ja ovdánahttit iežaset jurdagiid. Astrid Johnskarengii lea maid dehálaš maŋisboahttiide muitalit ovdalaš áiggiid eallima birra vai sii dihtet mo sin váhnemat ja máttarváhnemat leat eallán ja birgen.

Maid Astrid Johnskareng lea čállán?

Astrid Johnskareng lea čállán muittašangirjji «Mu Uhca gáfegievnnáš» (1990) mas son muittaša eallima Kárášjogas ovdalaš áiggiid, sullii maŋimus čuohtejagi, iežas vásáhusaid ja eatnis ja áhčis muitalusaid bokte. Son lea maid jorgalan sámegillii nuoraid girjji «Soahti Billávuonas» (2003), man norgalaš girječálli Kari Vinje lea čállán.

Astrid Johnskareng lea čállán mánáidgirjji «Civkkas» (2000) mas leat mánáide muitalusat ja lávlagat. Magnus Vuolab lea ráhkadan nuohtaid dáid mánáidlávlagiidda. 2008:s almmuhuvvo su nubbi mánáidgirji «Muohtanásttážat» mii maid sisttisdoallá muitalusaid ja lávlagiid maid fáttát leat váldon mánáid árgabeai' eallimis.

Dáid girjjiid lassin lea Astrid leamaš mielčállin Kárášjoga gieldda jahkegirjjiin.

Go Kárášjoga boares girkus lei 250 jagi ávvudeapmi, de lei Astrid Johnskareng ávvudangihppaga mielčállin.

Girjjit

 

Jorgalan:

  • Soahti Billávuonas (2003)

 

© Davvi Girji OS 2008