5. Ahtanuššama áigi (1970–1995)

Synnøve Persen (1950–)

bildebeskrivelse

Synnøve Persen. © Máret Sárá.

Dáiddár ja girječálli

Synnøve Persen lea govvadáiddár ja girječálli. Son lea riegádan Porsáŋggus ja orru Billávuonas Porsáŋggus.

Synnøve Persen lea vázzán dáiddaoahpu ja bargá dáiddárin ja girječállin. Su dáidda lea čájehuvvon ollu dáiddačájáhusain sihke Norggas ja olgoriikkain. Son lea Norgga beale Sámi beakkáneamos dáiddáriid gaskkas.

Synnøve Persen ráhkada ieš govaid girjjiidasas, ja su girjjiin sihke teaksta ja govva dahket oppalašvuođa. Son čállá hui minimalistalaš stiillain; ii son geavat ollu sániid govvádallamiidda, muhto juohke sátni lea baicca dárkilit válljejuvvon. Oanehaš moattesáni divttat ovttas su iežas govaiguin addet lohkkái saji dovdduide ja jurddašallamiidda.

2006:s Synnøve Persen oaččui Sámiráđi girjjálašvuođa bálkkašumi girjjiinis meahci šuvas bohciidit ságat. Dat lea diktagirji mas válddahallá botnihis morraša go massii mánás.

Su diktagirji biekkakeahtes bálggis lei namuhuvvon davviriikkaid girjjálašvuođa bálkkášumi oažžun 1992:s.

Almmuhan

  • alit lottit girdilit (1981)
  • blå fugler flyr (1983)

  • biekkakeahtes bálggis (1992)

  • vindløs sti (1992)
  • ábiid eadni (1994)

  • havets mor (1994)

  • muora ii galgga sojahit eambbo go gierdá (2000) 
(Duojár Jon Ole Andersena birra)
  • mođir hafsins (2001) Ábiid eadni islánddagillii.

 

 

Gáldu

Gaski, Harald: 25 sámi čáppa- ja fágagirjjálaš sátneduojára. ČálliidLágádus 2006



 

© Davvi Girji OS 2008